"Empty tokens" կամ "overpriced pixels" արտահայտությունները հաճախ օգտագործվում են NFT-ներին բնութագրելու համար: Բայց ի՞նչ են NFT-ները, և ինչու՞ են կարծիքներն այդքան հակասական:  

NFT հապավումը բացվում է որպես Non-Fungible Token, ինչը նշանակում է, որ յուրաքանչյուր NFT յուրահատուկ է և չկրկնվող, և չի կարող փոխարինվել մեկ այլ NFT-ով: Այն տարբերվում է կրիպտոարժույթներից, նրանով, որ անհնար է NFT-ն բաժանել ավելի փոքր մասնիկների և օգտագործել դրանք։ NFT-ն կարող է սահմանվել որպես կրիպտոակտիվների տեսակ, որը ներկայացնում է որևէ իրի սեփականությունը:

NFT-ները կիրառվում են բազմաթիվ ոլորտներում, ինչպիսիք են թվային արվեստը, երաժշտությունը, խաղերը և վիրտուալ անշարժ գույքը: NFT-ների շնորհիվ նկարիչները կարող են տոկենիզացնել իրենց աշխատանքը և ստեղծել առցանց ցուցահանդես, որտեղ ներդրողները և կոլեկցիոներները աշխարհով մեկ կարող են ձեռք բերել թվային արվեստ: Երաժիշտները կարող են տոկենիզացնել իրենց երգերը և վաճառել դրանք իրենց երկրպագուներին՝ առանց միջնորդների անհրաժեշտության: Խաղային ոլորտում NFT-ները մասնակիցներին թույլ են տալիս լիովին վերահսկել և կառավարել իրենց թվային ակտիվները, և նույնիսկ բարձր գնով վաճառել եզակի NFT գործիք, որն օգտագործվում է տվյալ խաղի մեջ կամ թվային ոլորտում իրենից արժեք է ներկայացնում: Վիրտուալ անշարժ գույքի շուկայում օգտատերերը կարող են տոկենիզացնել իրենց գույքը, ինչպիսիք են շենքերը կամ հողերը և զարգացնել վիրտուալ հողատարածք: 

NFT-ների ներդրումային ներուժը դժվար է գնահատել դինամիկ միջավայրի պատճառով: Որոշները մեծ եկամուտներ են ունեցել իրենց NFT ներդրումների շնորհիվ, մինչդեռ մյուսները տուժել են շուկայի բարձր անկայունության պատճառով: NFT-ները չափազանց անկայուն են շահարկումների և խարդախությունների առատության պատճառով: NFT-ի գնի վրա ազդում են տարբեր գործոններ, ինչպիսիք են NFT ստեղծողի համբավը, արտադրված քանակությունը, սեփականության պատմությունը և այլն: Խոսելով խարդախություններից՝ NFT-ի սեփականությունը ամենակարևոր թեմաներից մեկն է, որին պետք է անդրադառնալ: NFT գնելու ժամանակ պետք է պարզել արդյոք ներկայացված NFT-ն բնօրինակն է, թե պարզապես լավ պատրաստված կրկնօրինակ: 

Նախքան NFT ձեռք բերելը, կարևոր է ուսումնասիրել հետաքրքրող NFT-ի մանրամասները՝ հնարավոր կորուստների հավանականությունը նվազեցնելու համար:  

NFT-ների շուկան իհարկե գլոբալ է, սակայն հայկական շուկայում նոր հնարավորություններ նույնպես ստեղծվել են, ինչպիսին է օրինակ՝ ft.nft.am-ը, որը հայկական առաջին NFT հարթակն է ՀՀ դրամով NFT-ներ ստեղծելու, գնելու և վաճառելու համար: 

Ամփոփելով, կարելի է ասել, որ NFT-ները ունեն որոշակի խնդիրներ և մտահոգություններ մտավոր սեփականության և խարդախությունների վերաբերյալ: Սակայն կարծում եմ, որ կարևոր է օգտագործել այն հնարավորությունները, որոնք NFT-ները տրամադրում են և դրանք կիրառել այլ ոլորտներում՝ նոր պրոդուկտներ և հնարավորություններ ստեղծելու համար:  

Fun fact! Աշխարհի ամենաթանկ NFT-ն՝ «The Merge»-ը վաճառվել է 91,8 միլիոն դոլարով»: ☺