Ասում են՝ անունը և ճակատագիրը փոխկապակցված են: Շատ տեսություններ կան, որ իրար են կապում անձի անունը ու նրա ապագան, բազում գրքեր բացատրում են անձի հաղթանակներն ու անհաջողությունները՝ ելնելով անվանակոչությունից: Ու թեպետ նման կարծիքները գիտական որևէ հիմք չունեն, անունը, այնուամենայնիվ, լուրջ ազդեցություն ունի մեր ողջ կյանքի վրա: Պատճառը նրանումն է, որ մեր անունը որոշակի էմոցիաներ է առաջացնում թե՛ մեր մոտ, թե՛ դիմացինի մոտ: Մարդիկ հակված են, հաճախ՝ ենթագիտակցության մակարդակում, ունենալ իրենց պատկերացումները մեր մասին՝ ելնելով զուտ մեր անունից: Շրջապատող մարդիկ ընկալում են մեզ յուրովի, ու մեր անունը այս պարագայում որոշիչ դեր է խաղում: Մեր անվան ընկալումը կարևոր է ոչ միայն այլոց մոտ էմոցիա ու կանխակարծիք առաջացնելու հարցում, այլ նաև՝ մեր սեփական անձի ընդունման ու ինքնազգացողության համար: Եթե մեր անունը չենք կրում սիրով ու հպարտությամբ, եթե անունը մեզ մոտ անինքնավստահություն է առաջացնում, կամ պարզապես չի ասոցացվում սեփական «ես»-ի հետ՝ մեր ինքնազգացողությունը դրանից միայն տուժելու է: Մարդիկ, ովքեր չեն սիրում իրենց անունը, դժվարություն են ունենում կյանքի տարբեր փուլերում ցանկացած փոփոխություններին ադապտացվելու հարցում:

Ըստ ՀՀ Վիճակագրական կոմիտեի 2022-ին Հայաստանում ծնվել է 17158 աղջիկ և 19195 տղա: Իգական անուններից ամենկիրառելին եղել է Նարե անունը: Երկրորդ ամենատարածվածը Արփի անունն է: Ամենատարածված իգական անունների եռյակը եզրափակում է Մարիան: Տասնյակում են Մանե, Լյուսի, Մարի, Անահիտ, Անգելինա, Մարիամ, Եվա անունները: Արական անուններից ամենկիրառելին եղել է Դավիթ անունը: Երկրորդ ամենատարածվածը Նարեկ անունն է: Ամենատարածված արական անունների եռյակը եզրափակում է Հայկը: Տասնյակում են Մոնթե, Տիգրան, Արեգ, Մարկ, Միքայել, Դանիել, Ալեքս անունները:

Առաջին նվերը, որ ստանում ենք մեր ծնողներից՝ մեր անունը, մեր մասին առաջնային տեղեկությունն է, որ կրում ենք ողջ կյանքի ընթացքում: Անուն ընտրելը , միաժամանակ, և շատ հուզիչ է, և՝ շատ պարտավորեցնող: Անունները արտացոլում են ծնողների անձնական ճաշակը ու նախընտրությունը: Ընտրում են թե՛ ավանդական, թե՛ ժամանակակից անուններ: Ամենատարածված տարբերակներից է երեխային անվանել ընտանիքի այլ անդամի անվամբ` հիմնականում ծնողների:

Նոր տարածում գտնող տենդենց է ընտրել չկրկնվող ու տարբերվող անուն: Անունը կարող է կրել ազգային բաղադրիչ, ինչպես օրինակ՝ Հայկ անունը: Մեր ազգի հերոսների անունները լայն տարածում են գտել հասարակության մեջ: Վերջինիս վառ օրինակն է Մոնթե անունը: Սրբերի անվամբ անվանակոչելը թե՛ Հայաստանում, թե՛ այլ երկրներում դարեր շարունակ ամենաընդունված տարբերակներից է եղել (օր.՝ Մարիամ, Մարիա, Մարի, Մերի): 

Իզուր չէ, որ անուն ընտրելը ո՛չ միայն հուզիչ է, այլ նաև՝ շատ պատասխանատու: Լրջորեն մոտեցեք այդ գործընթացին և փորձեք այնպիսի անուն ընտրել, որը Ձեր երեխային կօգնի, այլ ոչ թե կլինի ինքնահաստատման փորձ սեփական ընտանիքում:

https://www.armstat.am

https://www.bbc.com/future/article/20210525-how-your-name-affects-your-personality